AW...GENTHEI KAHIN KHO!!!

.
AW...GENTHEI KAHIN KHO!!!
hi kile jou ding hinam...????
Kaneova pat katup leh kana doi pi pen chu Govt.service mua KANU le KAPA toh kaji kacha toh insung nomtah a lenkhom ding chu ahipen e.
Khosung Haosa Pu chapa changkhat kahi jeh chun "GAON BURA" kiti chu kamin abang jeng in,khosunga aneo alen in eikou nao khatchu ana hitai..
Kapan "Min...(Seiminthang) tuhin kei kahat nalaijin,khonunga himo nakhat tou kanei ja,dammo veiset na tobang kato jeng leh kakhonung hinchon ding leh kadin mun na hung ding di nahijeh in Pathen kisuhmil hih inlang Lekha hasim in simin chule napaneo te ahin naloi nagol hon abol khel aum leh nangaidam jiding,ngaidam na neilou chun ejat in ching jong leh angol toh thakhat ahi"eina tijing jie...
Epi asei naham la kahe thei jipon, "henge" kati bou chu ahijenge....
Kanu le Kapan Class ten na exam ahoi ngei2 leh result hungpot joulah khu na Birth Day jong ahin na B'day man toh na result ilop diu,golvah khat ibol diu ahi atiji lhonnin keijong katha nop nalangtah ahi jeh chun lekha kaha simin,1st Div.a passid di chu katup pi pen khat anahi toh kilhonin thil tampi umjong leh lekha bou in kalunglut e.
Class ten kasim kum final exam kapieh diu kon chun I Kho Uva inn 6 hungchao lut diu ahe tin kanun eihin seipeh in,keijong katha anomlheh jengin khosung lhunna inn thah,mi thah chule maaithah gahmu kal chu kangah lel lheh jenge...
Kakho uchu lamlon lai,kho sah kho lhang in ahopa uva agilkiel adang chah naova ahin jot jiu ahi jeh chun ka inn uchu kho mi titahlou in khosah kholhang hojong aum jing'in dei choum'a ahnou neocha gah kitha khom ma nehkhom tiho chu aum theipon,bubel me bel jong mi 5/6 insung hotoh akibang jing theije.
Kanu le kapa tao hat najalin Class ten exm chu damsel in ka hin joutan,kaloi kagoul hotoh kakilhah lel lheh vangun picnic kaman jou u ajingin nikhat jong um be louvin kho mi te leh kanu kapa munom jeh chun inlang kahung potdoh taije..Gala pat kakho uchu kagah galvet leh nidang sangin tin inn jong ahakimu lheh taije.Kimneo leh aloinun khopam chun thing tiding anapo lhonnin,kimneo Loinu chu kamu khah lou jeh chun "nangla Koi kho nahi na??"tia kadoh jeng leh "Khonomphai ho" ahinti'e...
Ahung chenglut thah ho ahi chu kahe doh bep in "nanghi bah kamu di hija tuchung inlang hungkal kana hiti ngalel ten hiveh ta o" tin kagel pai jengin,Kimneo chun kaum chan chu ave in "tuchung inlang nahungdoh chu naum chan aki khel lheh e" eiti e..
kaum chan kikhel hilou in Kimneo loiinu chun eilhim joh ahe.
Kimneo Loinu chu kave chim thei tapon, twi donding ahinki poh lhon chu kimneo loinu chu avet toh twi chu kadon pieh2 le kana don chai lam kahepon,Kimneo in "Hemin..twi nadon chai tah chuo,keini donding umtalou,natwidon man kaloinu Lhingcha thingkhu tan hu tang.." eihin tin kagel leh kajah jong achan alangkhat a kagel kit leh katwi donchai jeh a amin ka het lojeh chun khoh ka sa diehpon alang khatna kagel kit leh twi chu donbe di umle Lhingcha thuchu kihet be diham ti pou kagel e.
Lhingcha chu anomlou sasan thing chu katan pieh in khosung ka hin jonlut taove...
Khosung chu ana nomlheh jengin,inn thah tampi ana umin,inn 70 ana lhing tai.Keiding in vang Kamasanga thing ponu hung chenlut chu kakipana penkhat ahije.
Keijong kaum sung ni ejat jou ham apat in Lhingcha te inn na chun kaga kho lai leng jing pantan hinlah ka loi kagoul hochun Lhingcha toh akideijin eina se pan taove.Ajeh chu kholai leng behseh jilou kahin Lhingcha te inna kache jing jeh a chu ginmo theijong vang kahi e.Thu chu aha hung kisei lheh tan kanun ahinjah doh phat in nikhat eidong tai.Kenjong kaki ngai lhon hilouva ken kadei joh ahi dan phati chan kaseipeh in ahi leh kanun "Min...Lhingcha khu chapang phatah ahinai..insung chaloh ho afel in,insung maicham siem na in jong alamkai ji'e..hinlah na ki ngaija na ki lungst lhon ahijong leh chingthei in khosungmi thusei ding atam'e" tin eihil in Lhingcha hina tampi jong kahe doh be in katha anom lheh jenge..
Phat ache jingtoh kilhonnin Ka exam result chu jing nikho a out ding ahitah jeh chun ajinga school mun na chedingin kaki guotai.
Chijan chun khosunga jukham a kisen ahung umin,Khosunga Youth hon Ka innsung uva ahin kailut taove.
Keijong koi bep ahidem tia ka room langa koun kalhai dohle Lhingcha pa ana hi'e...
Lhingcha chu toh anu inn polanga lhase tah a ding chu kagah mun kave thei tapoi...
Kapa ahung houlim tan" Lhingcha pa hi tuchunga thilsoh tobang hi amasa pen ahitapon,khosunga ana kisen jing'in avel2 in ana ki ngaidam'e hinlah tuchung hi phat masa a 'ka bol kit leh apet2 in khosung vengsung ot tange' tia ana kitep na bangin khosung a otdoh diu chu hijengin te" ati tai.
Ajing nikho jingkah in result kaga kilah masangin Lhingcha te inna kaga kholai Len leh Lhingcha leh anu chu lhase tah in anakap lhonne...seidi la kahe pon,lhingcha komma chun "result nhung kilah lou diham....??" kati leh alu peijin eidonbut poi...
seibe ding ka het tahlou jeh chun kahung kinung letai....
Lhingcha ten khosung a otdoh diu chu ka geltheipon ka lunggel chu anom thei mong2 tapoi.
School mun kaga lhungin hungkile thei ahiloujeh chun kahung gieh den tai..ka result chu ahoi lheh jengin hinlah akipa je jong kahepoi...Ajing nikho in ka result chu kipah thim,lungna thim tah in inlang kahung ki le tai..Alangkhat in Kei ki2 pah hih jongleh ka result,1st Div.kamu jeh a Nu le Pa kipa di chu kagel leh kakipah thou vin hinlah Lhingcha te umlou dichu kakipana loupen khat chu ahie. Insung chu kipah tah in kahin jot leh kho mite ka in toulu va chun ana dimset un,kanu insunga anakap e...Keijong ema seidoh theitalou in kading dentan epi thilsoh ahidem ti chu geljonggeljongkagel kagel nompoi,kanun ei mu2 chun eikolin "Boipu....Napa janhi lhah in,jansot langin pasal mi 4 ahung uvin napa inna koun ahung kaimang uvin tuchannin koiman athu jong akihe tapoi....epi ati tadem o...!!" tin akap den tai.Seidi la kahe tapoun kahet mo mannin "hung kile kit tante kap2 hih in tin kalhem mai2 e."
Kaki nepna kanu leh kapan kipah tah a ka result ana nga lhon dinga kagin chat chu kaki holna kana in eina kilamdot tai...
Kapa thu chu kakhol2 vangun kahe mong2 tapouvin,bu ne lou ann nelou chun kanu cha lhon chun kaum lhon tan,ahung kile ding chu ka nga tho jeng lhon ahi..
Khosung mite chun najong kitoh thei talou vin kapa thu chu aboipi un Ka result chu koiman ejatna ka passid na,ka fail ham ka passid hamjong eiki dongtapoi..
Khosung haosa pu mang ahijeh chun Haosa langa lamkai phabep chu akihou khom jingun agam sunga chun hetsahthei2 ahetsah taove.
Nikhat hi kho nupi ho thiing poa ache naova janmang dinga jong dei umlou kapa longdamsa chu ahinmu taovin chini kho chu Ka Birth Day nitah ahi..
Hinkho chedan chu lamdang kasan,ka dingha oleh nuiding ham jong kahe thei tapoi....
Lonlhin eichup in hinkho genthei na chun eivai lhun pan ahitai.
Kanu chun kapa thithu dol ahetna pat in kho helou in alhu ji tan,kho ahin hetdoh teng leh kapa loung damsa lang chu ahin del ji'e.
Kei ka passid na ahoi leh mi khop dinga kapa'n anasei chu akileh beh in ama joh in thinan mi ahi khomtan hinlah katahsan thei hih lai e.
Kanun kacheng ahin lajin abang komleh kho helou in alhuden jin
"Oh....Min pa..
Insung ki ngaina nahi helou a eti lungmol lom2 nahi'a thip beh a lum nahim...?
Ven...Minthang in a result aga la taije..khatvei beh hijong leh na passid hinam.. tin lang gah dong tangem...
chi lai hi nalup namun ahipoi....
nalup na a galumin...."
tiho kanun ahinsei doh chun khosung miho leh ahung kikhom ho chu amitlhi souh lou aum poi...
Haka a kapdoh thei chu hileng kadoh di kanomin keijong chu kalungel asan val ji jeh chun kho helou in katou namun na kana lhuden jin,
kahung khah doh2 leh kapa loung lang chu kadel thoji tai..
Kanu toh,kapa loung chu ka it lhon sasan damsunga amel mukit talou din insunga koun eiput doh peh taove..insung chu thil le lo beija cheng bangin athom hao lheh jengin kapa akivui doh jeng vang chun khola che hung kinung lekit thou2 dibangin kalunggel a kinepna kanei jinge.
Kapa kivui doh kal Hapta nilang achetan hinlah kanu cha lhonnin ann ne jong kaum kha lhonpoi..Jingkah khat kanun "Boi..
natah san alel val ahitai..hungin bu ne hite.."atin kalup na a koun eikai thou vin ann chu kane lhonne..
Bu kaneh pet lhonnin kanu chu ahung kapdoh kit tan "Boi..napa lai'a hi tou ji a kei lai'a hi katouva nahung ding thu kana seiji lhon ahe.." tin ahung kapjah jengin...
seidi la kahe tapon,aki lhem to ding beijin kakap den lhon tai..
Alang khatna Khosung haosa pu bei ahitah jeh chun Akhel dingin kapa neo chun apoh dingin deisah ahitai..Kanun jong aphatsah in Kho sunga Haosa langa lamkai ho chun "Seiminthang hi tuhin kho sung vaipo thei ahilou laitoh kitoh a ahin poh thei to kah a apa neo vin pontin,apan anasei ji bangin vaipo thei ahung hiteng aman apoh ding ahitai" ti chun kilol na khat asiem un kenjong pha kasahtoh kilhonnin soi (sign) kaga kaije.
Alang khatna Lhingcha te chu kho otdoh di ahiuvin,thu kitan sa chu not thap in aum tan...
Kapan Haosat ana poh a Khosung Semang Pachong kilheng sa ho geijin ahin khel taove..Kapa chu epi jeh pen na eina thapeh uva epi atoh khel um ahidem???
Chule koi thaham tiho chu kahe doh nai hih in,kanun la ahepon,khosung mila kadoh lamlam in ahe kit poi..kalung gela chu kahet doh leh thajeng ding chu ahipen ne.
Phat le nikho ache jingin X-Mas le New Year ho chu kap pumin kahin mang chai taove.
Ka school kaikhom piho chun school munlang ajon pankit taovin,keivang chu lung boinan kadim e.Kapaneo te chu ki ngap sung lou keihon inko mong-mong a kagel vangun ama hon eigel thei pouvin,ajeh chuu kapa pa(kapu) chun jini ana neija aji masa chachu kapa ana hin aneolai uva pat kapa chu ana munom lou sao ahi dan chu kanun nikhat eisei peh in,hijong leh kapa bang2 a kagel dingin jong eihil e.
Kapaneo te inna kanu kada lhah ken lekha simding chu kagel theilou jeh chun kanu toh uma loubol dingin kaki gel lhatai..Lou chu kahin vatpan taovin kabol khahlou ho chu kahin bolpan taije.Khosung kipoh chu achoum mong2 tan,jukham nom akhamin taz kapnom in akap in...
Hou Inn kaipet le pou akidel aum tan..kho min phatah misei phat kho chu tun vang mi nuisat in aumtai..
Alangkhatna Lhingcha komma chu kalungset nathu kalel hih laijin,lungla kalungset lheh jeh chun jankhat kholai lengin kaga chetai.Ka Upa,keidinga kapa neo chapa jong chu ana tou ve.Lhingcha houpi nading phat chu aum lou jeh in chomkhat katouvin,Kahung kile kit tai..
Kaga kholai leng jingin Ka Upa umlou kah leh khomi te adimset jijeh uchun ema kasei doh theipon..hinlah kakipa nakhat chu Lhingchan thukhat kasei nom ahi ahet chu ahi.
Lekhathot joh a seidingin lekha'n kasunnin Kimneo in eina pehpeh dingin kape tai..
Ajing nilhah in Kimneo in lekha thot donbut na ahin choidi bou chu khaltwi bangin kangah jingtai.Kaki nepna bangin kanga chu ahung tan,kipah tah a kagah honleh hitin akisunne..
'Hemin..
Neihin lungset jeh in kaki pah e..
Genthei kahin in chen lou chen dan jong kibang lou ihin chi ho kagel jiteng jachat nan kadim ji'e.
Hinlah kenjong "Kana lungset jing nahi"
Laidang tampi hung leng ji jong leh katah san jou ding aum pon,chu leh eiki pasah jou aumpoi..nangin jong neilungset kahe in kenjong nangin neilungset bangin kahin lungset ne.Hinlah HeLalboi (Kapaneo chapa) in sotna pat eijol ahitan hinlah midang toh kaki lungset e kana tipeh in,naki ngaipi pa kahetdoh nileh katha di ahi eiti ji in ajoleh nangho insung kah a boina sembep kahi ding ham....tin kagel in hijeh chun lungset lheh ing kating nangin jong neingai lheh jong le chun 'KI LUNGSET HINKHO MAN KHOM DING AHAH SAI " neingai damin.
Keima Lhingcha.
tia kisun lekhathot chu kamu2 in akipa toh alung han kakop in umding dan hahsa kasa e.Lhingcha kalungset ana hesa Kanu koma kasei leh "Lhingcha koma chun Na U Laboi toh kilungset dingin seitan,ajoleh boina hikhan te" eiti tai.Kenjong Lhingcha chu ngai lheh jong leng kanu sei chu phajo dingham insung kito nading joh deijeh in Lhingcha chu Lalboi toh kilungset dingin kavai lhah tai.
Alangkhat na Lou lholai ahung hi tan,kalou lhon chu agam lhat jeh chun kanu toh loubuh a kageh den lhon tai.Khosung chu kangai ji val in,abang leh kalou Buh koma Kem kido achun katou jin Lhingcha ngainan kamao ji'e.Jankhat kamao jinglai in kanu ana khosih jing chu anat ahin lel tan,eiki thopi ding la aumpon anat chu alel valjeh chun jankhang janvai in khosung langa kahin polut tai.In kahung lhun lhon leh mi ana emu thip chet jengtan,Kapa neo te suhkhah di katin "He paneo,Kanun anat alel in louva koun kahin po in tua chu kahung lhung bep.." tia kaga seileh
eina lung han khummun "jankhang nunga angol ngap nahim? jingkah joh le hungve nange." eihin tiu vin alungnat le alung han toh kop in ka inlang chu kajon tai....
Insunga mei ti ding toh,lupna pha ding toh kaboi lah2 jeng pet chun gelphahchu louvin Lhingcha leh Kimneo ahung lut lhonnin jansot nunga hunglut ahi lhonjeh chun "ole kaha gelbeh jeh a chu kamu ngap ahidem kana tin'ahivangin kanu toh ahung kihou chun atah ahi chu kahe bep e.
Twi salum a om lhonnin,poun ho eipha peh lhonnin chiho abol kah lah lhon chun kalel behseh jeh chun banglhang'a kagah lup leh kana ihmu mil tan mang khat kamu e....
Kanu chu toh kapa lhannin kache lhonnin,chia chun kanu lhase tah in akap e.
"Min..pa ven neida lhah jou lhonna pat hinkho nopna kiti katouh lhonpoi.Boipu jeng jong school kakai sah jou pon,adei angaijeng jong kape joupoi..
keijeng jong kahin kho hi agenthei val tan nang naum na a Pa komin kahin kho eilah peh lhon dingin hinsei tan..."
tin lhase tah in akap e.Kamang chun kanu chu kapan eihung pui doh pieh tan,lunggel neilou bangin kachangin eina da lha lhon tai...
Lhase tah a kaka leh kahung kap doh in kahung king khange..
Jingkah nidan 1:30 lang ana hi tan,Kimneo chu atou na a ana lulhu dit det in,Lhingcha vang chun kanu keng ho ana sot peh e.Kanun paodoh lel sasan"Boipu...Lhingcha hi hung khel in akhop val ding ahi taije..na emut lhuh apat eisot pieh ahitai.." ahinti chun kaki phalam in gakhel di kati leh ahung lunghangin nang nu le2 nahi sah a nachu ti kiphat lam ham? ajo teng kaga emut san ding ahi"tin tot toh tah tokop in ahinsei je.
Kaki dai2 lhon leh Kanun "Lhingcha,Boi...nei ngailut lhonjeh in kaki lheh jenge..tujan chu nang ni hung lhon hih le chun kahin kho ajoni hung hi tante." tin ahin seijin Lhingchan "Heno..Ken katoh dinga lom katoh ahi..." ti chan bep in adon but in kanu akeng kham ho adam mo ho themkhat a olphat chun Lhingcha jong kichol dingin asol tan kenjong "Lhingcha..gaki choldo tan,kei ka imut ahitan ahinlel kit beh seh leh hinsu khang nange.." tin emu dinga kasol leh anom pongsan pon a emu nomlou mong nahi leh koi sol khoh nahi hih e tin kasol tapoi.
Lha ejat kikhen nung jou ham chun Lhingcha chutoh thakhat in katou khom kit lhonne.
Amel chu kavet jiteng lungmon nan kadimjin a o kajah teng kipa nan kadim ji'e..
"Hemin..neivet dan chu neimu khah lou abang jenge.." tin ahung tot in kenjong "ahi poi..Lhing.. ven nang ngaina in sun le jannin kamao jin,janteng jong leh ihmu mon KEM CHUNGA nang ngainan kamao2 ji'e..tu tobanga itou khomkit dinghi kana gelpha poi..namel chu kamit lha a aum ma kachanga hinkho kahin mankit teng namel chu kamai a abeh den thei nadinga kahin vetjoh ahe" kati leh amitlhi valset chu abeng nou chitchet lai chun ahung longlhan amitlhi chu katheh peh in kalhem e..
Kachunga ahung ki ngaijin "Hemin..namel mulou a hinkho kaman jiteng katahsa hi lhagao neilou a hing toh kabangjin,louva koun khatvei2 inlang nahung phah jap jia eki muto teng nangin neihou jihih jong le chun etih leh namel kamu dem tin nitin in kangah jing ji'e..tujan jong chu Kimneo kaga kitiem a nalou umna a chu hungdi kati leh na in u avah phatna kahung lut pa lhon ahe" ahin tie kenjong "ahipoi Lhingcha nagel khel ahi..kahin houji lou na chu Ka U Lalboi toh kilungset nahi tah jeh a chu hou ding kanop ji vanga kihetmo sah kahi ji ahibouve.."
katileh ahung lunghangin "nangin He Lalboi toh ki ngaijin nati manna chu kaki ngaipi jeng diham....Dongma jong ni aneije.Tia kilungset sangin ki ngailou chu pha kasa joi..Lung jong kalungset thei mong2 poi.." athusei chu ajop paijin "He Min..Kada kacham louva kichen pi di eitin hichi jeh a chu kapu te inlanga lekha athah a sim di tokop a jing leh chedi kati ahitai.." ahin ti chun seidi kahe tapoi..
Eilungset jeh in kaki pah in,eida lhah ding ahijeh chun kalha ase e.
Kenjong kakol chah teh tan,"Lhingcha cheda theile chun kati e..hinla nangbeh lekha phatea nasim di chi apha in,nache di ahi jong leh genthei kei nahin lungset jing hi haimil tih hinnei hih in o...?" kati leh "Hemin..neitiel khou jeh in kaki pah e..thinan eikhaen tilou in kikhen kit tapoi te o..nang jong min epi seijongleh lunglha lou in eina ngah jingin" ahin tie.Jingkah nidan 4 am vel ahung hitan Lhingcha jong jinga kal soung doh di ahijeh in aloiinu Kimneo asu khangin achephei lhon tai.
Jinga koun Lhingcha melmu lou va hinkho mankit ding chu athi ding toh kaki bahsah in hinlah chelou thei ahipoi.Jing nikho avah in Lhingcha jong ahung kigo doh tan khomi ten kanu damlou ahung ve un,kenjong khopam chanchu kaga thah e..
Eida lhah di chu kagel thei hih beh jengin hijong leh cheding ahitah jeh chun amitlhi loung chu katheh peh in kap pumin Lhingchan "Hemin namel mulou a chomkhat bon kium theilou a kum khat langset namel mulou va umding kanom poi,neilungset leh cheda ing kating lungtup molso tahi te ahin tin kengjong ahipoi Lhingcha echapang jep in nang jong lekha nahin simma kei ema hihih jong leng nang beh in nule pa lungtup molso jo tan katin kanei sun ka khut jem kabu chu kasut in kabu peh in"KA KHAOKHI NAHI TAI katin.... nale kha sim na a pontho inlang neihin hagel jival hih ta o..nahung kitding kana nga jing ding ahe o" kati leh kapthim nuithim pummin "henge"ahin tin mitlhi pumin kama sang lang lhonna Kimneo leh anu che chu agah delin keijong kahung kinung le tai.
Kanu jong anat a oldom tah vangin che le vah le thei ahilou jeh chun kachangseh in lou kaga koun jin abang komleh loulai jin kamao jin angol toh kaki louji e.Kum le lha ache jingin X-Mass leh New Year ho anai tan chi kum ahin thing aki manlheh jengin hinlah thing kimat chu keiho kho dingin ngolna ana hijoi..Haosa pu kapa neo jeng jong ju khamin kholai a akisen jingin khomi te chu aneo alen umlou in khamna theija angol gamtaove..Genthei aki hijeh in keivang chiho bol ding chun kilom kaki sajou pon,hinlah kaju don lou jeh chun kaloi ho tampi thet in kaum jinge....
Kanu khat vei kom2 adammo tengleh kalou va koun 25km a gamla saijang chanchu thing kahin pojin,idu ingai jeng jong nelou in kasum mu chasun achun lou ho leh insung thil kacho jin khatvei komleh nule pan hahsa tah a school eina kaisah laiho chu lungin alang jie.
Khomi ten gari gari in thingkai jongleo kenvang kaidi kham kaneilou jeh chun thangset naleh lunggel nan kadim jin "O....kapa hi damnalai leh keiho intoul injong gari kingan tin' tiho kahin geldoh jiteng lhaset nan kadim jie.Khat vei2 leh "O GENTHEI KAHIN KHO HI kile lou ding hitam?? kati jie.Lhingcha jong kahoupi khah tapon aman jong eihin hou khapou ajeh chu phon kichoi lou,kichoi jong leh ntwrk umkit lou ahi.
Kum 2 lang achetan nikhat hi kaloipa James in "Baai..Jingleh Lhingcha hung di ahi tai.." eihin tipeh in hinlah chipa hin eidai hinte tin kagele..
Tahbah in ajing nikhon Lhingcha kum nilang kihou louva kaum jou lhonnin amel kamu tah bah in kaki pah lheh jenge.Hinlah Lhingchan eimu chun ndang toh abang tapon hou ding jong eigo tapoi....
Kalunggel chun 'ae..ama ho tua lekha them hitao va eiti ki apbet but jenga milah a houdi chu eija chat hinte' hinlah kum hijat pi kingah a nadam hinam behjong tithei a umlou,eida lhah lele chu kalha ase thouve..A inn nuva kaga kholai leng jin hinlah eihoupi khah tapoi..
Kalha ase in che jong kacheji tapoi..
Nilhah khat vadunga kisila kache leh Kimneo jong a school kaina akoun ahungdoh in lampi a kaki muto in Kimneo jong ana hoi mong mong taije.Kimneo in "ash..hemin nana hoi tana e..Lhingchan namu le chun vang..." tin eihin daijin kenjong "kahoi bah hija eimu a houdi jong eigot lou hinte" tin kaki dai lhonnin Lhingchan lekha eihin thot chu eipe in keijong in lhunna lupna chunga simding chu kangah lel lheh jeng tai.
Ale khathot chu kasim leh..
"Ka lungset pen Hemin..
Damma eki muto thei jeh in pathen kahin thangvah e.
Kache ding koun na neivai lhah na cheng tu ni channin mil tih kanei thei pon,
kale khasim na injong nang dingin taona kahin mang jingin,
chuleh kanu ahung teng nagenthei thu ho aseijin athusei hojong ngaithei lou in lonlhin kalong jie..
Laidang tampi hungleng jong leh kahung kile kit na lungtup imolso dibou chu kangah lel in,tun kahung lhung tai..
Hinlah hemin kanei ten hung thum di eiti tao vin kanu le kapan jong aphatsah di kaging chai..hinlah nang toh ki khenna hinkho mansangin Khulsin ding kanom joi..
Kahin kho hi nang thu thu ahitai..nang khut in aume...
kana seisa bangin neilungset leh lungtup molso dingin kangah jinge..
NA KHAOKHI SA keima Lhingcha."
tia kisun chu kamu mun kalung aboijin ajeh chu micha gah kipuija genthei thoh sah ding chu kanom pon,themkhat jong kiemlou a eina lungset jing chu pah jong kaki pah in chomkhat khongai tadi hite tikit ding chu ajoleh aneiten hung thum uhen lang Lhingchan kalungset lou jeh a kaga puilou in agel khadem tiho pou kagelin hijeh chun kanu doh dingin kagel tai..
Kanun "Pathen thilgon hijo tante....GENTHEI HINKHO KILE NADING joh hitan te..chenlang gaki puitan...."ati tai.
kanu seibang chun James kaki houpi in Lhingcha chutoh lungtup molso dingin khosung chu kada lha lhontai.Lhingcha nu chun eiphat sah peh in hinlah chijan chn Lhingcha pa chu ana khamin ka nu komma ana kitom in thadingin eina hole.
Kadei pen leh kangai pen toh kakho sah te lou jao va hinkho kaman lhonna chu hapta khat lang ahitan nikhat kaloipa James ahungin kapaneo(Kho Haosa) in anat alel a eikou2 jeng ahidan eisei peh e.Lhingcha chun ajoleh eikhen unte tin khosung chedi anom pon hinlah thinan eikhen tilou va kikhen louding kahi lhon chu kasei peh in,kholang chu kajon taove.
Ka inn uva chun Lhingcha toh kanu ana damlou chu kada lha in kapaneo te inlang kadel thojeng leh khomite ana dimset un Lhingcha nu le pan jong mitlen tah2 in eina ve lhonne.
Kapaneo chun eimu2 in akap tan kakhut chu atuh in "Boi...kakhel naho nei ngaidam tei2 jin,nei ngaidam jouding hinam???" tin eidonge.Kadonbut in "Hepaneo epi jeh a ngaidam thum nahim keijoh in ngaidam kathum didol ahi..." kati leh "ahipoi boi..
Haosat hi keichun hinkho sangin thupi jon kagel in,haosat deijeh a napa chu mi kana thasah ahi...."tia ahinsei chu kalungsung tienga kisun abangin,kum hijat kanu toh genthei kathoh chu lungin ahung langin,kavou jang anan seidi jong hemon kaume.Kapa that kahet doh2 le thadinga kagel chu kama sanga lum thiding koun kapa neo ma2 ahin,Oh Kahin Kho hi eti mong2 hija ahahsa langbou kato ham tia gelbou chu kabol thei pen ahi...
Alangkhat na bolkhel tajong leh mijouse masanga athepmo na athi dikoun a aphoun kaki pahjoi...Kapan eina hil naho chu lungin alangin Seithei mo sasan kap pumin kalha mounin "ae..hepaneo chiho pou chu seita hih in achesa chu achesa ahitai..kapa jong khatvei hijong leh kihou limpi thei hileh midang sanga napa neo vin kahin kho alah chu kalung among joi tin te..nache a naki muto lhon teng nachapa Seiminthangin ei ngaidam ahitai..phat chesa ho gel doh tahih in" tipeh jon...tin kalha moun mai2 e.Kapaneo chun Lhingcha pa kom chun "Kachapa hi nacha nu toh kicheng hi ana khen hih beh in o....??" ati chu asei chai mai2 in kapa banna kaki ngaina kapa neo injong eida lhatao ve.
Kapa thini chu avelin lunggin alngin,Oh....hinkho genthei kithoh chimset sa chu aveiin ahung lhung kit e..
Kum tampi achetan,Kapaneo athijou apat Haosat kapoh najong kum 3 alhing tai.
Pathen lungset in Kapan haosat ana pouh lai a sangin inn atam jo tan,ka in chen jong adet tai.Cha ni (Pasal khat leh numei khat) kanei jin kakho nung hinchon thei dikhat pasal kanei jeh in kaki pah lheh e.
Hinlah Lhingcha pa chun khat vei2 akham jin "kacha nu lekha simlai nana kichenpi" tin eihou sal jap2 ji in Lhingcha leh anu aki thoji lhonnin aphoh ji lhonnin kasa lah2 jap2 ji nalai uve.
MORAL: CHAGA LE SIEL NAOCHAGA KILE THOU THOU
<><><><><><><>BEITA<><><><><><><>